Proiektua abiatu aurretik han-hemen ibili zen Cilveti hainbat gaztandegi eta proiektu bisitatzen eta gaztaren inguruko ikastaroak egiten. “Hogei ardi besterik ez nituen hasi nintzenean, gurasoen artaldetik gelditzen ziren gutxi horiek”, dio. Hurbileko beste artzainei erosten zien esnea, baina pandemian osabaren ardiak hartu zituen eta pixkanaka artaldea handitzen hasi zen. “Gaur egun ia gazta guztia nire artaldetik lortzen dudan esnearekin egiten dut. Latxa arrazako muturbeltz adardunak ditut”. Bera bakarrik dago proiektuan eta ehun bat buru ditu, talde txikia, nondik begiratzen den. “Gazta egiteko artalde txikia da berez, baina niri nahikoa lan eskatzen dit”, dio umorez.

Urtaroei guztiz lotutako maneiua egiten du artzainak: negu partean eta umealdi garaian Olagueko ukuiluan izaten ditu eta herriko belardietara ateratzen ditu bazkatzera, eta jezte garaia bukatzen denean mendira igotzen ditu, Okolin eta Saioa ingurura.

Gaztarekin eta hartzidurarekin jolasean

Betiko ardi gazta ondua egiten du Cilvetik, baina hasieratik argi zuen bestelako gazta motekin probak egin nahi zituela. “Etxean betidanik egin izan den hori egiten segitzen dut, baina erronkak ere nahi nituen, eta dibertigarria zait probak egitea, gazta desberdinak bilatzea…”. Esnearekin eta hartzidura prozesuekin jokatzen hasi zen, eta jezte garaian pasta biguneko camembert moduko gaztak ere egiten ditu. “Koagulazio laktiko bidezko beste batzuk ere egiten ditut, eta horietan ere azalarekin eta formarekin jokatzen dut: adibidez, azal beltza du batek landare-ikatza duelako, beste batek oreganoa edo albaka daramatza azalean, beste batek piperrautsa…”.

Olaguen "Tia Maritxu" dendatxoa du Cilvetik, eta bertan saltzen du gazta kopuru handiena. Pozik dago bizitza berriarekin eta gaztandegiak daraman martxarekin, baina bidean zailtasun asko topatu dituela nabarmendu du. “Herrietan jendea falta dela asko esaten da, baina pena da hemen bizitzea eta lan egitea hain zaila izatea, hainbeste tramite egin behar izatea, baimenak… proiektu hauek bultzatu eta gure lana erraztu behar luke administrazioak, trabak behin eta berriz jarri beharrean”, amaitu du.