Historia handiko etxea da Azkarateko (Nafarroa Beherea) Harizpea. “Etxe biziki polita da, herriko plazaren ondoan dena, eta erraten da herriko lehen etxea dela”, azaldu du Laura Irigaray Herriko Etxeko kideak. Horrelako eraikin askorekin gertatu ohi den bezala, historikoki aberatsen etxea izan da, eta 2002an eraikina enkantean atera zenean, espekulazioaren kontrako mobilizazio handiak sortu ziren, eta horren ondorioz, Herriko Etxeak erosteko eta herriari zabaltzeko aukera izan zuen. “Behin erosketa eginda, Tequio kooperatibarekin elkarlanean hasi ginen gogoetatzen, galdeketak egiten, Euskal Herrian zeren beharra zegoen ikusteko, eta ohartu ginen edarigileek elkartzeko eta saretzeko leku baten beharra zutela”, azaldu du Irigarayk.
2016tik ARGIAn astero esperientzia baten berri ematen du.
Hartziduraren Besta egin zuten Azkaraten (Nafarroa Beherea), maiatzaren 17an.
Harizpea Edabeen Etxea izena hartu du eraikinak, eta Azkarateko Herriko Etxeaz eta Tequioz gain, Euskal Herri osoko hainbat proiektu ari dira egitasmoa bultzatzen: Markina-Xemeingo (Bizkaia) Leartiker, Deikazteluko (Nafarroa) Biosasun oliba edari ekoizlea, sagardogintzan diharduen Lekarozko (Nafarroa) Eztibeltza kooperatiba eta Ortzaizeko (Nafarroa Beherea) Hartzi hartzituen proiektua, besteak beste. “Bilkuretan jende anitz elkartzen da eta giro oso polita sortu da, sumatzen da bazegoela elkargune baterako gogoa”, gehitu du Irigarayk. Egitasmoaren bultzatzaile nagusiez gain, guztira 20-30 bat edari ekoizle dira interesa erakutsi dutenak eta bilkuretan parte hartzen ari direnak.
“Denak dira ekoizpen oso ttipiak edo artisauak, eta mota askotako edariak egiten dituzte”. Edariez hitz egitean ardoa eta sagardoa datozkigu burura batik bat, baina edari aniztasun handia dago proiektuan: kafegileak, txakolin ekoizleak, garagardogileak, konbutxa eta bestelako edari hartzituen ekoizleak… “Proiektua abiatu berri da, orain Tequiok segituko du kudeaketarekin, finantziazioa bilatzen eta juridikoki egitasmoak zein forma hartu dezakeen aztertzen”. Momentuz, bilkuretan parte hartzen ari diren ekoizleen artean hainbat lantalde sortu dituzte, lanean segitzeko eta hurrengo urteetan eman beharreko pausoak definitzeko.
Aurrera begirako ideia eta proposamen asko dituzte esku artean Edabeen Etxeko bultzatzaileek: edarien erakustokia sortzea, salmenta gunea jartzea, tresnak eta jakintzak partekatzeko toki bat prestatzea, formazioetarako aukera duten gelak egitea, sukaldea martxan jartzea… “Orain taldeek definituko dute zer behar den, eta zer egiten ahal den eraikinean elkarrekin, eta horretarako finantzaketa bilatu beharko da”, dio Irigarayk.
Dena dela, badira babes zabala jaso duten zenbait asmo, martxan jartzea aurreikusten dutenak: hartzidurak egiteko inkubagailua jartzea, adibidez. “Hartzidura anitz bada gure edarietan, eta hori bada landu nahi den gaia, horregatik ekarri genuen maiatzaren 17an Hartziduraren Besta Azkaratera”, adierazi du.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Bidelagun
cc by-sa
Sareko kide
Ekoedizioaren Institutuko bazkide
