Euskadiko Nekazaritza Ekologikoaren Kontseiluak (ENEK) ohartarazi du merkataritzan ohikoak diren izendapen asko "antzuak, edota engainagarriak izan daitezkeela: naturala, jasangarria, birsortzailea, bertakoa, sasoikoa, km0, eta abar". Horiengandik bereizita, ekoetiketak araututa eta babestuta daudela azaldu du: "ekologiko, biologiko eta organiko". Hain justu araudi ekologikoa ezagutzeko aukera dute herritarrek, ENEK eta EHKOlektiboak elkarrekin antolatu dituen saioetan.

Agroekologia zer den ere azalduko dute

Agroekologiaren oinarrizko kontzeptuak ulertzeko ere balioko dute saio hauek. Antolatzaileek azaldu dutenez, "Agroekologiaren oinarria nekazaritza ekologikoa da, eta EHKOlektiboak ere bide horretan urratsa eman zuen 2024. urtean: agroekologiaren gutxieneko baldintza gisa,
nekazaritza ekologikoaren ziurtagiria eskatzea berrezarri du, koherentzia eta fidagarritasuna indartzeko".

Nekazaritza ekologikoak eta agroekologiak zertan bat egiten duten eta zertan bereizten diren argitu dute antolatzaileek: "Nekazaritza ekologikoa Europako araudi ekologiko batek arautzen du eta ekoizpen eredura mugatzen da. Agroekologiak ekoizpen eredutik haratago doazen beste esparru batzuk ere barne hartzen ditu, ikuspegi integralago bat eskaintzen digu, ingurumenarekiko orekan, elikadura burujabetzan eta tokiko komunitateen indartzean oinarritzen da".

Laborarien bizipenak eta ahotsa hurrengo hiru saioetan

Laborantza agroekologikoa egiten duten hiru etxalderen esperientzia ere ezagutuko dute. Bilboko saioan Mikel Kormetzana (Urduña, Santa Klara baserria) laborariaren ahotik ezagutuko dute bere errealitatea. Lazkaoko saioan Gorka Sasieta (Itsaso, Urkulegi baserria) laborariak hartuko du hitza eta Donostiako saioan Josetxo Lucas (Lezo, Apaiziartza eta Urrele baserriak) laborariak azalduko du haien proiektua.

Herritar, laborari eta dendariei zuzenduta dauden hiru saio hauek, zehazki leku eta hitzordu hauetan egingo dituzte: otsailaren 10ean Bilbon, 16:30ean Zabalgune eraikinean. Otsailaren 11n Lazkaon, 16:30ean Biziolan. Eta otsailaren 12an Donostian, 16:00etan Cristina Enean.

Saio hauek ez dira ENEK eta EHKOlektiboak elkarrekin antolatutako lehenak izango. Irailean eta urrian beste hiru saio egin zituzten Amorebieta-Etxanon, Azpeitian eta Gasteizen. Antolatzaileek saio horiekin jarraitzeko beharra sumatu dute, "kontzientziazioa lantzeko".