Bailarako udalek finantzatu dute nekazaritzako lanpostu berria, eta Landa Garapenerako elkartea da administrazio eta kudeaketa lanez arduratu dena. Bailarako proiektuei eskaini zitzaien laguntza, eta ekimenean parte hartzera animatu ziren sei ekoizlerekin ari da lanean Blanco. Ekoizle txikiei arnas ematea eta sektorean erreleboa bultzatzea dira egitasmoaren helburu nagusiak, baina baita eskualdeko proiektuen arteko sarea bultzatzea ere. “Hainbat ekoizpenetan pertsona bera aritzeak sarea ere egiten du, eta badira elkarrekin egiten hasi diren gauzak, landare bila joatea edo agroasanblada aktibatzea, adibidez”, azaldu du Blancok.

Bergaran, Antzuolan, Oñatin, Eskoriatzan eta Izurtzan ortugintzari lotutako proiektu agroekologikoetan ari da lanean Blanco: “Hilabeteko edo bi hilabeteko egutegia antolatzen dugu ekoizleekin kontrastatuta, haiek adierazten digute zein egunetan datorkien hobeki”.

Erreplikagarria den eredua

Ortulaguntzako kideak nabarmendu duenez, ekoizpen guztiek ez dituzte behar berak, eta bakoitzari eskaintzen dion ordu kopurua ere ez. “Zenbait proiektutan oporrak kideen artean betetzeko aukera dute, baina beste batzuetan ez, pertsona bakarra ari delako edo lan karga handia dutelako. Bestalde, denak ez dira lurren eta azpiegituren jabe, edo ez dute lan gaitasun bera”, dio. Lanen kudeaketa langileak egiten du, baina bi ekoizlez eta landa garapen elkarteko kideez osatuta dagoen jarraipen batzordea abiatu zuten hasieratik, eta hau arduratzen da langilearen zaintzaz eta lanaren jarraipenaz.
Bultzatzaileek uste dute beste toki askotara eramateko modukoa dela proiektua. “Nekazaritzak asko ematen dio gizarteari eta oso egoera zaurgarrian dago, sektore prekarizatua da, ekoizleek lanordu asko sartu behar izaten dituzte… beraz, uste dut garrantzitsua dela diru publikoa horrelako proiektuetara ere bideratzea”, amaitu du nekazariak.