Arabako eguzki energia beste parke bat, Ekian, EAEko handiena.

FV Ubalza II izeneko proiektua aurkeztu zuen Cañaveras Solar enpresak Eusko Jaurlaritzaren aurrean duela astebete inguru, zeinak Aguraingo lurretan 48.960 eguzki plakaz osatutako zentral fotovoltaikoa eraikitzea xede duen. Egitasmoak 30,9 MWeko potentzia izango luke, eta 50 hektarea inguru hartuko lituzke. Bada, EH Bilduk aurkeztutako mozioa astearteko osoko bilkuran onartuta, Aguraingo Udalak errefusatu du proiektua.

Raul Lopez de Uralde Aguraingo alkateak azaldu duenez, zentral fotovoltaikoak onura sozial eta ekonomikoak izan beharko lituzke herritarrentzat, eta, horretarako, hainbat aldaketa egiteko eskatu dio enpresa sustatzaileari. Cañaveras Solarrek, ordea, proposamen horiek "axola gabe" jarraitu du egitasmoarekin: "Udal Gobernuak hainbat eskaera egin dizkio enpresari, proiektu hau energia berriztagarriaren hedapenari ekiteko defendatzen ditugun printzipioetan txertatzeko. Eta orain arte ezezko erantzuna jaso dugu. Horregatik gaude proiektu hauen aurka". 

Cañaveras Solarri eginiko proposamenen artean, honako bi hauek azpimarratu ditu Lopez de Uraldek: zentral fotovoltaikoak ez ditzala hartu balio estrategiko handiko nekazaritza lurrak eta gutxienez biziguneetatik 500 metrora egon dadila. Horrez gain, enpresari eskatu dio proiektuaren harira sortutako sozietatean parte hartzeko aukera izatea herriko erakunde publikoek, sozialek eta ekonomikoek.

Energia Berriztagarrien Lurralde Plan Sektoriala onartu arte, zentral fotovoltaikorik ez

Proiektuaren enpresa sustatzaileari soilik ez, eta Aguraingo Udala Eusko Jaurlaritzari ere ardura eske mintzatu zaio. Hain zuzen, Udalak Jaurlaritzari eskatu dio ez dezala FV Ubalza II egitasmoa gauzatzea baimendu Energia Berriztagarrien Lurralde Plan Sektoriala onartu arte. Izan ere, plan horrek ezartzen du hamar hektareatik gorako eta bost MW baino gehiagoko zentral fotovoltaikoak ezin direla eraiki balio estrategiko handiko nekazaritza lurretan. 

Ubaza eta Ubaza II

Ubaza II ez da Agurainen zentral fotovoltaikoak egiteko Cañaveras Solar enpresak Eusko Jaurlaritzari aurkeztu dion proiektu bakarra: EH Bilduk aurkeztutako mozioak jasotzen duenaren arabera, 2023ko maiatzean aurkeztu zion Ubaza egitasmoa Jaurlaritzari, herrian 38.000 plaka instalatzea aurreikusten duena eta 21,3 MWeko potentzia edukiko lukeena.